ორსულობის I და II ტრიმესტრის სკრინინგ ტესტები
რეპროდუქციულ კლინიკა ReproART-ში ორსულობის პირველი და მეორე ტრიმესტრების (ორმაგი და სამმაგი) სკრინინგ ტესტები ნაყოფის გენეტიკური დარღვევების რისკის ადრეული გამოვლენისთვის კეთდება და დედის სისხლისა და ნაყოფის ექოსკოპიურ გამოკვლევებს მოიცავს. ორივე მათგანი აუცილებლად ერთსა და იმავე დღეს ტარდება. ტესტების პროცესში გასათვალისწინებელია დედის რასა, ეთნიკური წარმომავლობა, ასაკი, წონა, მავნე ჩვევები და ანამნეზი.
მიღებული შედეგების დამუშავება რეპროარტში სპეციალური კომპიუტერული პროგრამით ხდება. აღნიშნული პროგრამა ნაყოფის გენეტიკური დარღვევების კვლევებისა და მათი სტატისტიკური ანალიზის საფუძველზე შეიქმნა. იგი ნაყოფის ქრომოსომული ანომალიების — 21 ქრომოსომის (დაუნის სინდრომი), 13 ქრომოსომის (პატაუს სინდრომი), 18 ქრომოსომისა (ედვარდსის სინდრომი) და ნერვული ღეროს დეფექტის არსებობის რისკის შეფასების საშუალებას იძლევა.
ორსულობის პირველი ტრიმესტრის (ორმაგი) ტესტი
ორსულობის პირველი ტრიმესტრის (ორმაგი) ტესტი ორსულობის 11-13 კვირაზე ტარდება. შედეგად, ორსული ქალის სისხლში ორი ჰორმონის კონცენტრაცია — თავისუფალი ქორიონალური გონადოტროპინი (β-hCG) და ორსულობასთან ასოცირებული სისხლის პლაზმის A პროტეინი (PAPP-A) განისაზღვრება. ტესტის ჩატარებისთვის ულტრაბგერითი გამოკვლევით ნაყოფის თხემ-კუდუსუნის ზომას, კისრის ნაოჭის სისქესა და ცხვირის ძვლის ზომას ადგენენ.
ორსულობის მეორე ტრიმესტრის (სამმაგი) ტესტი
ორსულობის მეორე ტრიმესტრის (სამმაგი) ტესტი ორსულობის 16-18 კვირაზე ტარდება. ორსული ქალის სისხლში სამი ჰორმონის კონცენტრაცია — თავისუფალი ქორიონალური გონადოტროპინი (β-hCG), ალფა ფეტოპროტეინი (AFP) და არაკონიუგირებული ესტრიოლი (UE3) განისაზღვრება. ტესტის ჩასატარებლად ექოსკოპიური გამოკვლევით ნაყოფის ბიპარიეტალურ დიამეტრს, ბარძაყის ძვლისა და თავის გარშემოწერილობის ზომებს ადგენენ.
ვისთვის არის რეკომენდებული ორსულობის I და II ტრიმესტრის სკრინინგ ტესტები?
ტესტების ჩატარება ყველა ორსულისთვისაა რეკომენდებული. ტესტების ჩატარება განსაკუთრებით მნიშვნელოვანი შემდეგი ფაქტორების არსებობის შემთხვევაშია:
- ორსულის ასაკი — 35 წელი და მეტი
- ოჯახის ანამნეზში თანდაყოლილი დეფექტების არსებობა
- ორსულობის დროს მაღალი რისკის მედიკამენტების გამოყენება
- თუ ორსულს შაქრიანი დიაბეტი აღენიშნება
- თუ ორსულობის დროს გადატანილია ვირუსული ინფექცია
- თუ ქალი რადიაციული ექსპოზიციის ქვეშ იმყოფებოდა
- თუ ულტრაბგერითი გამოკვლევის დროს 21,18, 13 ქრომოსომების ტრისომიებთან ასოცირებული ანომალიები აღინიშნება
- თუ მამას რობერტსონული ტრანსლოკაცია აღენიშნება
გამოკვლევის შედეგები
ორსულობის პირველი და მეორე ტრიმესტრების (ორმაგი და სამმაგი) სკრინინგ ტესტები:
- ახდენს პრენატალური სკრინინგ ტესტებით ნაყოფის გენეტიკური დარღვევების რისკის იდენტიფიცირებას
- მაღალი რისკის მაჩვენებელი არ ნიშნავს, რომ ნაყოფს გენეტიკური დარღვევა აუცილებლად აქვს. იგი დიაგნოზის დაზუსტებისთვის დამატებითი გამოკვლევების ჩატარების აუცილებლობაზე მიუთითებს
- თუ პაციენტი მაღალი რისკის ჯგუფს ეკუთვნის, დამატებით რეკომენდებულია ინვაზიური გამოკვლევა, მაგალითად, ქორიონის ბიოფსია და ამნიოცენტეზი
აღნიშნული მეთოდებით დაუნის სინდრომის იდენტიფიცირების მაჩვენებელი დაახლოებით 97.5%-ია.
იმისთვის, რომ დაგეგმო რეპროარტის მეან-გინეკოლოგთან ვიზიტი თბილისის, ქუთაისის ან ბათუმის ფილიალში, აუცილებელი არის წინასწარ ჩაწერა.